څوک چې په ټاکنو او ډموکراسۍ باور ولري، د ډموکراټیک بنسټونو پر ضد نه درېږي، ځکه تاسو خپله د یوه ډموکراټیک بهیر پایله او زېږنده یاست. په دغه لیک کې اصلي خبره دا ده چې د ملي یووالي حکومت د بنسټیزو او مهمو کارونو په توګه یو هم د ټاکنیزو اصلاحاتو راوستل دي، چې دا چاره په هېواد کې د ټاکنو او ډموکراسۍ د ساتنې او د نظام د پایښت تضمین کوي، او په دې چاره کې ناغېړي کول د ټاکنو او ډموکراسۍ او په ټوله کې د هېواد سیاسي نظام راتلونکی له ګواښ سره مخامخ کوي. عزتمنو! «د ټاکنیزو اصلاحاتو کمیسیون» چې باید د لوړې د مراسمو په سبا باندې رامنځته شوی وای، له څو میاشتو ځنډ وروسته د فرمان په صادرېدو رامنځته شو، په داسې حال کې چې د دغه کمیسیون کاري موده د کومې رسمي غونډې له جوړولو پرته پای ته ورسېده. اوس مهال چې د حکومت د کار له پیلېدو څخه نږدې یو کال تېرېږي، په دې برخه کې هېڅ ډول ګام نه دی پورته شوی. په داسې حال کې چې د اساسي قانون د حکم پر بنسټ پارلماني ټاکنې باید ژر تر ژره تر سره شي. د دغه کمیسیون د ریاست پر سر اختلاف چې په ظاهره کې د دغه کمیسیون د کار د نه پیلېدو اصلي لامل بلل کېږي، ډېر د منلو وړ نه برېښي. موږ په دې باور یو چې که چېرې د هېواد په ټاکنیز نظام او جوړښت کې د اصلاحاتو لپاره اراده وي، دغه وړې چارې په دې برخه کې د کار مخه نشي ډب کولای. «د ټاکنیزو اصلاحاتو کمیسیون» په هېواد کې د ټاکنیزو اصلاحاتو د پيل ټکی دی چې ډول بدیل یې ځای نشي نیولای. له بلې خوا د هېواد په ټاکنیز سیستم او جوړښت کې ژورو ستونزو ته په کتو سره یوازې یو بنسټ چې له بې پرې، مسلکي او نخبه کسانو څخه جوړ دی، کولای شي د دغه کار جوګه شي. دغه کمیسیون باید واک ولري ترڅو په ټاکنیزو قوانینو او جوړښت کې د ټولو شته ستونزو او ننګونو له هراړخیزو پلټنو څخه وروسته د ټاکنیزو اصلاحاتو ملي طرحه په یوه څرګنده او روښانه عملي برنامه کې د وړاندیزونو له وړاندې کولو سره، جوړه او اجرایي مراجعو ته یې وړاندې کړي. په هېواد کې شته ناورین ته په کتو سره د نظام د قوو د مشروعیت د ناورین دوام د ستونزو کچه لوړولای شي. له بلې خوا هغه بېړه چې په اساسي قانون کې د پارلماني ټاکنو لپاره مطرح شوې، باید ژر تر ژره دغه کمیسیون رامنځته او په رسمي توګه خپل کار پیل کړي. فیفا د یوه مسلکي بنسټ په توګه له عالي جنابانو څخه غواړي ترڅو پرېږدي چې خپله کمیسیون له رامنځته کېدو وروسته د خپل اداري پلاوي په ټاکلو کې رایه ورکړي. عالی‌جنابانو! باید نن لاس په کار شو، ښایي سبا ډېر ځنډ وي. که څه هم اوس مهال په هېواد کې امنیت، ټیکاو او اقتصادي ودې ته اړتیا ده، خو ټاکنیز اصلاحات د هېواد سیاسي پرمختګ، ټیکاو او د نظام راتلونکی تضمینوي او همدارنګه د هېواد د بچو او د راتلونکو نسلونو راتلونکی تضمینوي. ټاکنې یو تاریخي او ملي بهیر دی، دغه ملي ارزښت ته باید د ډله ییزو او ټیمي کړنو په توګه ونه کتل شي. خلک د ملي یووالي حکومت له مشرانو تمه لري ترڅو د سیاسي هوکړه لیک ګټې چې د دولت-ولس اصلي بنسټونه پرې ولاړ دي، په تېره بیا د ټاکنیزو اصلاحاتو موضوع په کلکه په پام کې ونیسي. له بده مرغه چې موږ د هرې ورځې په تېرېدو سره وخت او فرصت له لاسه ورکوو، باید همدا نن لاس په کار شو. حکومت باید د ټاکنیزو اصلاحاتو ټولګه چې د ټاکنیزو اصلاحاتو کمیسیون د کار پیل، د پارلماني ټاکنو نېټه او په ټاکنیز نظام کې بنسټیز اصلاحات پکې شامل دي، اعلان کړي. یوازې په دې ډول د افغانستان ماتېدونکې ډموکراسۍ د ټیکاو په لور روانه شي او د ملي یووالي حکومت مشران د دې ملي وجیبې په تر سره کولو سره خپل نوم په تاریخ کې ژوندی کړي. د روژې د مبارکې میاشتې، د لوی څښتن تعالی د مېلمستیا د میاشتې وروستۍ ورځې دي او د کوچني اختر د رارسېدو ورځې دي، هیله من یو چې د ملي یووالي د حکومت مشران د ټاکنیزو اصلاحاتو د رامنځته کولو لپاره مټې راونغاړي او د هېواد وګړو ته لا خوښي ورپه برخه کړي. په ډېر درناوي د افغانستان د ازادو او عادلانه ټاکنو موسسه – فیفا د ۱۳۹۴ کال د چنګاښ ۲۵مه- کابل