د ټاکنیزو اصلاحاتو بهیر کې د ځنډ په تړاو د فیفا دریځ

»فیفا د ټاکنیزو اصلاحاتو د کمیسیون رامنځته کېدو او د هېواد د ټاکنو په بهیر کې د اصلاحاتو په راوستلو کې د ځنډ له کبله اندېښمن دی او د ملي یووالي له حکومت څخه غواړي چې په دې برخه کې ژر تر ژره لازم ګامونه پورته کړي« د نړیوالو معمول پرنسیپونو پر بنسټ هغه هېوادونه چې کړکېچنې او له ناندریو ډکې ټاکنې تېري کړي، د ناورین پر مهال یا وروسته له هغه، د تېر بهیر په هکله پلټنه کوي او د هغو د بیاځلي کېدو د مخنیوي لپاره لازم اصلاحات رامنځته کوي. له نېکه مرغه چې د ولسمشریزو او ولایتي شوراګانو د تېرو ټاکنو څخه وروسته د ملي یووالي حکومت ټاکنیز اصلاحات د خپلو لومړیتوبونو څخه وګڼل او د پلي کېدو په هکله یې په سیاسي هوکړه لیک کې هم ژمنه کړې ده. د ټاکنیز اصلاحاتو راوستل د افغانستان خلکو ته د ملي یووالي د حکومت ژمنه، بلکې نړیوالې ټولې ته یې هم همدا ژمنه ده. د ملي یووالي د حکومت رهبرانو د نړیوالې ټولنې د لندن په کنفرانس کې ژمنه وکړه چې ژر تر ژره به د هېواد د ټاکنو په بهیر کې هراړخیز اصلاحات راوړي. په عین وخت کې له تېرو ټاکنو څخه وروسته فیفا د تېرو ټاکنو د نیمګړتیا او ستونزو د په ګوته کولو په موخه د هېواد په اتو زونونو کې له خلکو او د نظر خاوندانو سره د سلا او مشورې غونډې جوړې کړې او له هغو سره بحث وکړ ترڅو د هغو انګېرنې او نظرونه راټول کړي. د ټاکنو د څارنې پر مهال او هم وروسته له هغه، د مشورتي غونډو څخه د فیفا موندنې ښيي چې د تېرو ټاکنو بهیر له ډېرو ستونزو، نیمګړتیاو او بې نظمیو سره یوځای وو نو اړینه ده چې د بهیر په اداري او تخنیکي برخه کې له قانوني چوکاټ سره سم پراخ اصلاحات رامنځته شي. د ټاکنو په بهیر کې د اصلاحاتو د پیل ټکی د «ټاکنیزو اصلاحاتو کمیسیون» رامنځته کول دي چې د سیاسي هوکړه لیک په متن کې یادونه شوې ده. فیفا په دې باور ده چې د ټاکنیزو اصلاحاتو بهیر باید له یوه ملي کړنلارې سره سم او د سیاسي اجنداو څخه پرته د دغه ملي بهیر د پیاوړتیا په موخه تر لاسه لاندې نیول شي او د ټاکنیزو اصلاحاتو د کمیسیون په رامنځته کولو کې هر ډول خنډونه او ځنډ د یوې رغنده پایلې لاسته نه راتلو لامل کېږي او نشو کولای د خلکو پراخ ګډون او شتون شاهد واوسو او نشو کولای د ۱۳۹۳ د ټاکنو ترخو تجربو مخنیوی وکړو. د ټاکنیزو اصلاحاتو په کمیسیون کې د متخصصو، مسلکي او بې پرې کسانو شتون د هېواد په ټاکنیز بهیر کې د بنستیز ریفورم یوه پیلامه ده.