. د یادونې وړ ده چې فیفا تر ولسمشریزو ټاکنو وروسته او په ځانګړې توګه په روان کال کې له ټاکنیزو کمېسیونونو سره یوشمېر غونډې کړي او تل یې د ټاکنو کمېسیون څخه غوښتي چې د خپلو قانوني صلاحیتونو له مخې د ټاکنو قانون د تعدیل طرحې مسوده چمتو کړي او له ښکېلو بنسټونو او سیاسي ګوندونو سره تر سلا وروسته هغه د عدلیې وزارت سره چې د ټاکنو قانون پر نوې طرحې کار کوي شریکه کړي، چې له بده مرغه د ټاکنو کمېسیون ونه توانېده چې د قانون د طرحې پر مسودې لکه څنګه چې موږ ورته وړاندیز کړی وو کار وکړي. بیا هم فیفا به په څو غونډو کې د ټاکنو تخنیکي او عملیاتي مواردو کې اصلاحي طرحې وړاندې کړي او همدارنګه د ټاکنو قانون د تعدیل طرحه به د ټاکنو کمېسیون او د ټاکنیزو شکایتونو کمېسیون مشرتابه ته وړاندې کړي او د ټاکنیزو اصلاحاتو پروسې سره د مرستې لپاره خپله دوامداره ژمنتیا څرګندوي. لکه څنګه چې یادونه وشوه، د عدلیې وزارت د تېرو څه دپاسه درېیو میاشتو لپاره د ټاکنو قانون کې د تعدیل پر طرحې کار کړی دی. فیفا د عدلیې وزارت له ښاغلي وزیر سره د خبرو تر څنګ وتوانېد چې د یاد وزارت تخنیکي ټیم سره چې د همدې موخې لپاره رامنځته شوی، څو غونډې وکړي او همدارنګه د ټاکنو قانون د نوې طرحې د بډاینې لپاره خپلې طرحې او وړاندیزونه هم تشریح او وړاندې کړي. همدارنګه فیفا د ولسي جرګې اداري پلاوي او د دغې جرګې د مشر دفتر ته یو رسمي مکتوب استولی او د ولسي جرګې له مشر او اداري پلاوي څخه یې غوښتي چې د ټاکنو قانون د تقنیني فرمان په اړه رایه اخیستنه وځنډوي او له عدلیې وزارت او نورو مسوولو بنسټونو څخه وغواړي چې د اړوندو بنسټونو سره په سلا د ټاکنو قانون نوې طرحه چمتو او د رایې اخیستنې لپاره یې ولسي جرګې ته واستوي. د یادو نیمګړتیاو او تشو د ډکولو لپاره فیفا د افغانستان دولت او مسوول بنسټونو ته د دغو مواردو وړاندیز کوي: ۱. ولسي جرګه د ټاکنو قانون کې د تعدیل او زیاتوالي په هکله د ولسمشر پر تقنیني فرمان رایه اخیستنه د (لیندۍ ۲۶مې) له اجنډا څخه وباسي او د عدلیې وزارت ته فرصت ورکړي چې د ټاکنو خپلواک کمېسیون او نورو ښکېلو بنسټونو له خوا د ټاکنو قانون طرحې له ترلاسه کولو وروسته د ټاکنو قانون نوې طرحه د رایې اخیستنې لپاره ولسي جرګې ته واستوي. ۲. له ولسي جرګې په درنښت هیله کوو چې د ټاکنو کمېسیون څخه وغواړي چې خپله تعدیلي طرحه د ټاکنو د تخنیکي او عملیاتي پروسې د سمون په موخه عدلیې وزارت ته وړاندې کړي ترڅو داسې واحده طرحه چې د بېلابېلو اړخونو د طرحو او نظریاتو منعکسوونکې وي، د قانوني مراحلو د بشپړولو لپاره ولسي جرګې ته وړاندې کړي. ۳. د عدلیې وزارت په ټاکنو کې د ټولو ښکېلو خواو د نظرونو او وړاندیزونو زېږنده وروستۍ طرحه ژر تر ژره ولسي جرګې ته وړاندې کړي او د دغې جرګې د درنو غړو د تایید او یا رد وړ وګرځي. باید په یاد ولرو چې په ملي شورا کې د ټاکنیزو قوانینو بحث باید ډېر اوږد نه شي ځکه چې بیا هم د اساسي قانون د حکم پر بنسټ د ولسي جرګې د تقنیني دورې د وروستي کال او د ټاکنو پر قانون د بحث په برخه کې د دوی د نه صلاحیت مسئله مطرح کېږي. ۴. د ټاکنو خپلواک کمېسیون د عدلیې وزارت ته د تعدیلي طرحې د وړاندې کولو تر څنګ د غزني د ولسي جرګې، د ولایتي شوراګانو او ولسوالیو شوراګانو د ټاکنو ترسره کولو پلان وروستی او د افغانستان حکومت سره همغږی کړي ترڅو د مالي او امنیتي ملاتړ په برخه کې یې پلان جوړ شي. په دې برخه کې د ۱۴۰۰ کال بودجې په طرحه کې د بودجوي پلان نشتوالي او له بلې خوا د غزني ولایت او ولایتي شوراګانو د ټاکنو لپاره د تمویلوونکو هېوادونو د لېوالتیا نشتوالي له کبله د فیفا اندېښنه پرځای ده. ۵. د افغانستان اسلامي جمهوري دولت له مشرتابه څخه غواړو چې په سیاسي هوکړو کې د خپلو ژمنو سره سم د سولې مذاکراتو کې د بریالیتوب لپاره د هڅو تر څنګ چې د ولس مهمه اړتیا او غوښتنه ده، د سولې په مذاکراتو کې د جمهوریت او د هغه د ارزښتونو دفاع کوونکي په توګه ټاکنیزو اصلاحاتو او د غزني ولایت د ولسي جرګې، ولایتي شوراګانو او د ولسوالیو شوراګانو د ټاکنو ترسره کولو ته جدي پاملرنه وکړي او لګښت یې د ۱۴۰۰ کال په بودجه کې په پام کې ونیسي. ۶. له نړیوالې ټولنې څخه د افغانستان د دولت او د ولسواکي نظام د ملاتړو په توګه غواړو چې د سولې مذاکراتو له پروسې څخه د خپل ملاتړ تر څنګ د دغې پروسې د سمون په برخه کې د اړتیا وړ ملاتړ ونه سپموي. ومن الله توفیق د فیفا مطبوعاتي ډله