د ټاکنیزو اصلاحاتو د بنسټیزو اصولو خبرپاڼه لاسلیک شوه

د «ټاکنیزو اصلاحاتو په ګډې کاري ډلې» کې د شاملو سیاسي حزبونو، د مدني ټولنې بنسټونو او د رسنیو رهبرانو او مشرانو د سې شنبې په ورځ په یوه لویه غونډه کې د ولسمشرۍ او اجرائیه ریاست د صلاحیت لرونکو استازو په شتون کې د ټاکنیزو اصلاحاتو د بنسټیزو اصولو خبرپاڼه په رسمي توګه لاسلیک کړه او هغه یې د ملي یووالي حکومت راغلو استازو ته وسپارله. د فیفا عمومي مشر احمد نادر نادري د دغه کنفرانس په پرانیستونکو وینا کې د ټاکنو او سیاسي بهیرونو کې د سیاسي حزبونو د رول اهمیت ته په اشارې سره وویل:" په ځانګړې توګه په یوه هېواد کې سیاسي پرمختګ لپاره اړتیا ده چې په سیاسي بهیر کې سیاسي حزبونه او مدني بنسټونه ونډه واخلي؛ په تېرو ۱۳ کلونو کې له بده مرغه چې د سیاسي حزبونو رول کم رنګه وو، په داسې حال کې چې باید بنسټي رول یې لوبولای وی." ښاغلي نادري د تېرو ټاکنو د ترخو او خوږو تجربو ته په اشارې سره ټینګار وکړ چې باید په راتلونکي کې د ورته ستونزو او ناخوالو څخه مخنیوي لپاره ګام پورته شي. نوموړي زیاته کړه:"هغه څه چې سیاسي رهبرانو د ټاکنیزو اصلاحاتو په هکله هوکړه کړې، په واقعیت کې هغه ژمنې دي چې د تېرو ټاکنو د ترخو درسونو له تکرار څخه د مخنیوي لپاره له خلکو سره کړي؛ چې په رڼا کې یې د هېواد ټاکنیز نظام اصلاح شي." ښاغلي نادري د خپلو خبرو په دوام کې د دې مهمې او حیاتي چارې په اړوند د حکومت د رهبرانو د ژمنو نه پلي کېدو څخه په نیوکې وویل:" د دې اعلامیې په لاسلیکولو سره غواړو سیاسي رهبرانو او د نظام رهبرانو ته وښیو چې د افغانستان خلک په هېواد کې د ټاکنیز نظام د اصلاح غوښتونکي دي او هیله من یو چې د ولسمشرۍ او اجرائیه ریاست استازو ته یې سپارل په هېواد کې د بریالي سیاسي بهیر د پیل لامل شي.» د غونډې په بله برخه کې د فیفا اجرائیوي مشر ښاغلي محمد یوسف رشید د ټاکنیزو اصلاحاتو په بهیر کې د سیاسي حزبونو او مدني بنسټونو د پیاوړتیا په برخه کې وینا وکړه او په دې برخه کې یې د سیاسي حزبونو، او مدني ټولنې/ رسنیو له نه ستړي کېدونکو هڅو ستاینه وکړه. ښاغلي رشید د دې خبرپاڼې د محتوا په هکله وویل:"په دې خبرپاڼه کې د ټاکنیزو اصلاحاتو ګډې کاري ډلې یو لړ اصلونه لکه د ټاکنیزو اصلاحاتو کمیسیون د کار بېړنی پیل، د رایې ورکوونکو د نوملړ جوړول، د برېښنایي پېژندپاڼو وېشل، د ټاکنیزو قوانینو اصلاح، د سیاسي حزبونو د ګډون او رول لوړتیا په موخه د ټاکنیز سیستم بدلون، د ټاکنیز جوړښتونو اصلاح، ځواب ویل او روڼتیا پېژندنه د خپلو ګډو اصولو په توګه په ګوته کړي دي."