د شکايتونو کمېسيون په ١٠ ولايتونو کې د ٥٥ محلونو رايې بې باوره اعلان کړې

د ټاکنو د شکايتونو د کمېسيون غړى او وياند احمد ضيا رفعت نن د تلې ٢٩ مه ، په يوې خبري ناسته کې وويل، چې د ياد شويو محلونو رايې وروسته له هغه باطلې شوې، چې په دغه محلونو کې درغليو په اړه شکايتونو ترلاسه او وڅيړل شول. نوموړي ونه ويل، چې دغه محلونه د رايې ورکولو د څو مرکزونو پورې تړاو لري، خو څرګنده يې کړه، چې دغه محلونه د فارياب، اروزګان، پروان، خوست، بغلان، لوګر، بدخشان، پکتيا، کونړ او ميدان وردګو په ولايتونو کې دي. دغه کمېسيون مخکې له دې هم د هېواد په بېلابېلو ولایتونو کې د رايې ورکولو د ١٣٠ مرکزونو رايې باطلې اعلان کړې وي. د ټاکنو خپلواک کمېسيون هم د تلې په ١٧ مه، د رايې ورکولو د ٤٤٢ مرکزونو رايې بي اعتباره اعلام کړې وې او تيره ورځ يې اعلان وکړ، چې په ټوله ييزه توګه ١،٣ ميليونه رايې باطلې شوې دي. دا په داسې حال کې ده، چې د رفعت په وينا، د ټاکنو د شکايتونو کمېسيون د رايې ورکولو د ٤٠٥ مرکزونو د رايو د باطل کيدو څخه د ټاکنو خپلواک کمېسيون ته خبر نه دى ورکړى. د رفعت په وينا، د ياد شويو محلونو د رايو باطل کيدل، د ولسي جرګې د ټاکنو په وروستيو پايلو اغيزه کولى شي. د ولسي جرګې په ټاکنو کې په ټول هيواد کې له ٢٠ زرو زيات محلونه، چې د رايې ورکولو نږدې شپږ زره مرکزونه کيږي، جوړ شوي وو. د رفعت د معلوماتو له مخې، ياد شوي کمېسيون تراوسه ٤٩٤١ شکايتونه ترلاسه ګړي، چې له دې ډلې څخه ٤٤٣٧ يې اولويت بندي شوې دي. نوموړي زياته کړه، چې د شکايتونو ٥٣ سلنه يې په الف ګروپ کې، ٣٢ سلنه شکايتونو په ب ګروپ کې او ١٥ سلنه نور يې په ج ګروپ کې شامل دي. رفعت درې ورځې مخکې ويلي و، چې تراوسه د ١٠٥٩ شکايتونو په اړه د څيړنو وروسته پرېکړه شوې ده او د نورو شکايتونو په اړه څيړنې روانې دي. د ولسي جرګې د ټاکنو لومړنۍ پايلې تيره ورځ اعلان شوې.د ټاکنو د پروسې د مهالويش له مخې، د ولسي جرګې د ټاکنو وروستۍ پايلې بايد د لړم په ٨ مه اعلان شي، خو د ټاکنون خپلواک کمېسيون د پايلو په اعلان کې د ځنډ د احتمال خبر ورکړى دى. د ټاکنو خپلواک کمېسيون د ولسي جرګې د ټاکنو سل په سلو کې لومړنۍ پايلې اعلان او په ځينو مرکزونو کې د يو ميليون او درې سوه زرو جعلي رايو د باطلېدو خبر ورکړ.